盧卡有望同爸爸一樣出戰世界盃。

曾帶領法國喺1998年捧走世盃冠軍嘅球王施丹，4個囝囝都子承父業投身職業球壇，雖然成就同爸爸就冇得比，不過第2仔盧卡就有望實現世盃夢！擔任門將嘅盧卡近日獲阿爾及利亞徵召踢世盃外，佢哋只要下仗擊敗索馬里，就鎖定決賽周資格。

27歲嘅盧卡司職門將，目前效力西乙球會CF格蘭納達，雖然佢由法國U16踢到法國U20，但因從未受國家隊徵召，佢就喺上月申請入籍阿爾及利亞，上月中獲國際足協批准後，阿爾及利亞即時召佢入伍，準備嚟緊對索馬里同烏干達2場世盃外。

阿爾及利亞國家隊有大量法國出生球員，包括王牌球星馬列斯、艾奧亞、艾洛利等等。阿爾及利亞目前喺世盃外非洲區F組排榜首，領先次席烏干達4分，殺入明年決賽周機會高唱入雲。